काठमाडौं, वैशाख २२

अमेरिकी डाइर्भसिटी भिसा (इडिभी) २०१६ को नतिजा सार्वजनिक भएको छ ।

सन् २०१४ को अक्टोबर १ देखि नोभेम्बर ३ सम्म इडिभी प्रोग्रामअन्तर्गत अमेरिका जान इच्छुक र शैक्षिक योग्यता पुगेकाहरुले भरेको डिभी लोटरीको नतिजा आज मंगलबार सार्वजनिक गरिएको नेपालस्थित अमेरिकी दूतावासले जानकारी दिएको छ ।

नेपाल स्थित अमेरिकन दूतावासले ट्विटरमार्फत नतिजा सार्वजनिक गरेको जानकारी गराउँदै आफ्नो नतिजा हेर्न अनुरोध गरेको छ ।

दूतावासले डिभी भरेकाहरुलाई आफ्नो रिजल्ट डिभीलोटरी डट स्टेट डट जिओभीमा हेर्न आग्रह समेत गरेको छ । छानिएकाहरुले अमेरिकाको स्थायी बसोबास कार्डका लागि प्रक्रिया सुरु गर्नेछन् ।

सन् २०१६ का लागि विभिन्न देशका ५५ हजार भन्दा बढी नागरिकहरुले स्थायी बसोबास भिसा पाउनेछन् । आवेदकहरुले कन्फरमेसन नम्बर सन् २०१५ सेप्टेम्बर ३० सम्म सुरक्षित राख्नुपर्नेछ ।